“ჩაიკა” გაზ-13, თეთრი (“Чайка” ГАЗ-13; “Chaika” GAZ-13)

მწარმოებელი	გორკის ავტოქარხანა (ГАЗ)
მოდელი	გაზ-13 ”ჩაიკა” (ГАЗ-13 “Чайка”; GAZ-13 “Chaika”)
გამოშვების წლები	1959 – 1981
ძარა	4 კარი, სედანი, ლიმუზინი (7 ადგილი), ფაეტონი (6 ადგილი)
ამძრავის ტიპი	4 × 2, უკანა წამყვანი ღერძი
ძრავა	ГАЗ-13, ГАЗ-13Д. 8 ცილინდრი 5526 კუბ.სმ, 195, 215 ცხ.ძ.
გადაცემათა კოლოფი	ავტომატური, ჰიდრომექანიკური, 3 საფეხურიანი
მაქს. სიჩქარე	160 კმ./სთ.
ავზის მოცულობა	80 ლ.
საწვავის ხარჯი	21 ლ. / 100 კმ.
გაბარიტები	5600x2000x1620 მმ.
ტვირთამწეობა	600 კგ.
წონა	2100 კგ.

ყველა სამთავრობო ავტომობილის მსგავსად, გაზ-13 „ჩაიკის“ ოფიციალური ფერი შავი იყო, თუმცა არსებობდა იშვიათი გამონაკლისებიც. ჯერ კიდევ სერიულად გამოშვებამდე, „ექსპო-58“ მსოფლიო გამოფენაზე ბელგიაში გაიგზავნა რძისა და ფირუზის ფერებში გადაწყვეტილი მანქანა მოოქროვილი რადიატორის გისოსით – მანქანების ორ ფერად შეღებვა იმხანად მოდაში იყო.

კიდევ ერთი საგამოფენო მანქანა ჟოლოსფრად და თეთრად იყო შეღებილი. წითელი ფერის „ჩაიკით“ მოსკოვისა და როსტოვის სახანძრო დაცვის უფროსები სარგებლობდნენ.

რაც შეეხება თეთრი ფერის მანქანებს, ცნობილია, რომ ერთადერთი “ქარხნული” თეთრი „ჩაიკა“ სპეციალურად პირველი კოსმონავტი ქალისთვის, ვალენტინა ტერეშკოვასთვის იყო დამზადებული და მას ემსახურებოდა – კერძო მფლობელობაში “ჩაიკის” ყოლა კოსმონავტებისთვისაც კი არ იყო დაშვებული.

თავდაპირველად სამთავრობო ფარეხებიდან ჩამოწერილი “ჩაიკები” უტილიზაციას ექვემდებარებოდნენ, მხოლოდ 70-80-ან წლებში დაიწყეს მათი ნაწილის ქორწინების სახლების გადაცემა, სადაც საქორწილო ლიმუზინებად იყენებდნენ. ამრიგად, ყველა რიგით ადამიანს მიეცა შანსი, ცხოვრებაში ერთხელ მაინც გაესეირნა “ჩაიკით”. ამ მანქანებს ხშირად თეთრად ღებავდნენ.